Samarqand davlat chet tillar instituti roman - german filologiyasi fakulteti qoshidagi “Nemis tili va madaniyati markazi”

Nemis tili va madaniyati markazi (o’z navbatida o’quv zali) 1997 yilda nemis fililogiyasi fakulteti qoshida tashkil topdi. Markazning ochilishida Germaniyaning o’sha vaqtdagi favqulotda va muxtor elchisi Dr. Reinhard Bindseil va boshqa elchixona vakillari qatnashishgan edi. U ushbu markazga ko’plab darsliklar, badiiy adabiyotlar va zamonaviy multimedia vositalari tuhfa etdi.

2002 yil markaz qaytadan ta’mirlandi va jihozlandi. Markazga ko’plab o’quv materiallari, darsliklar, texnik vositalar xorijlik hamda respublikamizdagi hamkorlarimiz orqali olib kelindi. Markazning ravnaq topishida 1996-2001 yillar davomida fakultetda faoliyat ko’rsatgan Winfried Scholten va uning rafiqasi Traudl Scholtenlarning xizmatlari katta bo’ldi. Ular markazda turli bayramlar, konsertlar, uchrashuvlar va seminarlar tashkil etishdi. Ushbu an’anani keyinchalik DAAD lektorlari Dr. Annette Krämer va Dr. Heiner Dinteralar davom ettirishdi.

O’tgan 9 yil davomida nemis tili va madaniyati markazi eng zamonaviy o’quv materiallari va dars jarayoni uchun zarur bo’lgan barcha texnik vositalar bilan ta’minlandi. Hozirgi kunga ushbu markazda turli xildagi ensiklopediyalar (Jahon adabiyoti ensiklopediyasi, til ensiklopediyasi, jahon tarixi ensiklopediyasi), grammatikaga oid 20 tomlik nazariy va amaliy adabiyotlar, 2500 ga yaqin badiiy adabiyotlar, 100 dan ziyod videokasseta va compakt disklar va boshqa ko’plab materiallar mavjud. Markaz o’z salohiyati bo’yicha Respublikadagi nemis tili va adabiyoti o’quv zallari ichida etakchi o’rinni egallaydi.

Markaz Germaniyaning DAAD, Goethe-institut Internationes, ZFA, Germaniyaning O’zbekistondagi elchixonasi va Avstriya konsulligi bilan yaqindan hamkorlik qiladi.