SAMARQAND DAVLAT CHET TILLAR INSTITUTI QOSHIDAGI KONFUTSIY INSTITUTI FAOLIYATI HAQIDA MА’LUMOT

Oʼzbekiston Respublikasi va Xitoy Xalq Respublikasi oʼrtasida barcha sohalarda hamkorlik aloqalari mustahkamlanib bormoqda. Xitoy Xalq Respublikasi Oʼzbekistonning mintaqadagi muhim iqtisodiy hamkorlaridan biri hisoblanadi.

Samarqand davlat chet tillar instituti Xitoy Xalq Respublikasining Oʼzbekistondagi elchixonasi, “Hanban” xalqaro tashkiloti, Shanxay xorijiy tillar universiteti, Shinjon agrar universiteti va Sian Xalqaro taʼlim universitetlari bilan faol hamkorlik aloqalarini olib bormoqda.

Oʼzbekiston Respublikasi Prizidentining 2013 yil 18 sentyabrdagi “XXR raisi Si Szinpinning Oʼzbekiston Respublikasiga qilgan davlat tashrifi davomida erishilgan kelishuvlarni amalga oshirish va ikki tomonlama hamkorlikni yanada rivojlantirish toʼgʼrisida”gi № F-4131-sonli Farmoyishi ijrosini taʼminlash maqsadida 2014 yilda Shanxay xorijiy tillar universiteti (keyingi oʼrinda ShXTU) va Samarqand davlat chet tillar instituti (keyingi oʼrinda SamDChTI) oʼrtasida imzolangan oʼzaro hamkorlik shartnomasiga muvofiq SamDChTI qoshida Konfutsiy instituti tashkil etildi.

Institut SamDChTIning bosh binosida joylashgan boʼlib, unda jami 12 ta auditoriya mavjud. Ushbu auditoriyalarning barchasi mashgʼulotlar olib borish va tematik klublar tashkil qilish uchun zarur boʼlgan texnik vositalar bilan jihozlangan.

2017 yilning may oyida SamDChTI qoshidagi Konfutsiy instituti hamda XXRning ZTE shirkati hamkorligida zamonaviy axborot-kommunikatsiya texnologiyalari vositalari bilan jihozlangan “Smart Classroom” (“Intellektual sinf”) oʼquv auditorisi tashkil etildi. 2018 yilda esa zamonaviy “Sinxron tarjima auditoriyasi” tashkil etildi.

Аyni paytda mazkur institutda 2 nafar mahalliy oʼqituvchi hamda 6 nafar XXRning turli universitetlari tavsiyasiga muvofiq tashrif buyurgan xitoylik oʼqituvchilar samarali faoliyat olib borishmoqda. Har yili ushbu institutda 100 nafardan ortiq turli yoshdagi tinglovchilar xitoy tilini oʼrganishmoqda.

FAOLIYAT SOHASI VA YOʼNALISHI

Institutning asosiy maqsadi - XXR va Oʼzbekiston Respublikasi xalqlari oʼrtasidagi doʼstlik aloqalarini mustahkamlashdan iborat.

Institut faoliyati:

• mahalliy yoshlarga hamda boshqa fuqarolarga xitoy tili va madaniyatidan mashgʼulotlar olib borish;
• turli madaniy-maʼrifiy tadbirlar tashkil qilish va oʼtkazish;
• tinglovchilarni oʼquv va oʼquv-uslubiy manbalar bilan taʼminlash;
•  xitoy tilini bilish darajasi (HSK) boʼyicha imtihonlar tashkil qilish va xitoy tili oʼqituvchilari oʼrtasida testlar oʼtkazish;
•  til va madaniyat sohalarida tajriba almashishni tashkil qilish.

Bundan tashqari Institut oʼzbek va xitoy biznesmenlari, fan va madaniyat arboblari oʼrtasida uchrashuvlar tashkil qilish, biznes-rejalar, shartnomalar hamda ilmiy loyihalar ishlab chiqishda ham faol ishtirok etmoqda.

Shuningdek, 2015 yildan boshlab Institut xitoy tilini bilish darajasini aniqlash maqsadida oʼtkaziladigan maxsus testlar (HSK, HSKK, BCT, YCT) tashkil qilib kelmoqda. Institutning moddiy-texnika bazasi, yaʼni oʼquv va ilmiy tadqiqot jarayonlari xitoy va oʼzbek mutaxassislari hamkorligida amalga oshirilmoqda.

Institutda taʼlim xizmati va unga boʼlgan talablarni yanada takomillashtirishga xizmat qiladigan va haftasiga 6 soatdan oʼquv mashgʼulotlari olib boradigan 7 turdagi (boshlangʼich kurs, uzaytirilgan kurs, biznes kurs, soʼzlashuv kursi, kallegrafiya kursi, taijiquan kursi, xitoy tilining HSK, HSKK darajalarini egallash boʼyicha maxsus kurs) oʼquv kurslarining loyihasi ishlab chiqilgan va ayni paytda faoliyati yoʼlga qoʼyilgan.

OʼQUV FAOLIYATINING TASHKIL QILINISHI

Oʼtgan (2015-2018) yillar mobaynida Institutda 900 nafardan ziyod tinglovchilar oʼqitilib, ularga tegishli sertifikat taqdim etildi. Hozirgi kunda ularning aksariyati oʼzbek-xitoy qoʼshma korxonalarida, turizm sohasida tarjimon sifatida faoliyat olib borishmoqda.

Institutda tashkil etilgan oʼquv kurslari xitoy tilini boshlangʼich va oʼrta darajada egallash, shuningdek, umumiy tarzda ogʼzaki va yozma tarjima koʼnikmalarini egallash asosida taqsimlangan. Institut kutubxonasida 10000 ta oʼquv-metodik kitoblar mavjud boʼlib, ulardan mashgʼulotlar jarayonida foydalanilmoqda. Bundan tashqari Institutning oʼzida mahalliy talabalarga moʼljallangan oʼquv adabiyotlari yaratish ustida ish olib borilmoqda. Xususan, Pekin shahridagi “The Commercial Press” nashriyoti tomonidan professor  Sh. Safarov rahbarligida 350 sahifadan iborat “Xitoy-oʼzbek tilining qisqacha lugʼati” chop etildi.

Institutda har yili talabga qarab, bir necha marotaba xitoy tilini bilish darajasini aniqlash testlari oʼtkaziladi. Test natijalariga koʼra tinlovchilar XXR universitetlarida 6 oylik, 1 yillik til kurslarida o’qishga, bakalavriat, magistratura va doktarantura ta’lim yo’nalishalarida grant asosida o’qishga tavsiya etiladi. Konfutsiy instituti granti orqali o’qishga ketgan tinglovchilar yotoq joyi va o’qishi bepul bo’lib, har oy ma’lum miqdordagi stipendiya bilan ta’minlanadi. Bundan tashqari o’qituvchi va tinglovchilar uchun yozgi ta’til programmasi ham mavjud bo’lib, bunda ular Xitoyning nufuzli ta’lim muassasalarida 2 haftalik stajirovka o’tashadi.

Institutda asosan xitoylik mutaxassislar faoliyat olib borganligi sababli yangi oʼquv yili sentabr oyidan boshlanib, iyul oyigacha yaʼni 10 oy davom etadi.

MADANIY-MAʼRIFIY ISHLAR

Yuqorida taʼkidlanganidek, institut viloyat, respublika miqyosida oʼtkaziladigan maʼnaviy-maʼrifiy tadbirlarda faol ishtirok etib kelmoqda. Xususan, institut tashkil qilinganidan buyon Samarqand viloyatidagi Turizm va maishiy xizmat koʼrsatish, Iqtisod, Maishiy xizmat kasb-hunar kollejlarida hamda akademik litseylarda madaniyat kunlari va turli uchrashuvlar oʼtkazilib kelmoqda. Institut 9, 10-sonli mehribonlik uylarida homiylik yordami koʼrsatib, maishiy jihozlar va bayram sovgʼalari ulashish bilan birga, maʼdaniy-maʼrifiy tadbirlar, davra suhbatlari tashkil etib kelmoqda.

Institut hamkorlikdagi ilmiy va innovatsion tadqiqotlar markaziga aylanib bormoqda. Xususan, Institut XXR, Janubiy Koreya, Mugʼuliston, Qozogʼiston va Oʼzbekiston olimlari hamkorligida amalga oshirilishi rejalashtirilgan “Buyuk Ipak Yoʼli” mamlakatlari lingvokulturologik atlasini tuzish boʼyicha ilmiy loyihaning bosh koordinatori hisoblanadi. Har yili ShXTU bilan hamkorlikda anʼanaviy tarzda “Buyuk Ipak Yoʼlida umuminsoniy va milliy qadriyatlar: til, adabiyot, taʼlim” mavzusida xalqaro konferentsiya oʼtkazilib kelinmoqda.

2015 yil 29 may kuni Shanxay Xorijiy tillar Universiteti Partiya Qoʼmitasi Raisi Jiang Feng boshchiligida Zang Zili, Yang Bo, Wu Airong, Wang Ning, Wei Jinshen va elchixona vakillari SamDChTIda tashkil qilingan ilmiy - amaliy konferentsiyada oʼz maʼruzalari bilan ishtirok etishdi. Xalqaro konferentsiyada АQSh, Buyuk Britaniya, Janubiy Koreya, Hindiston, Qozogʼiston, Mugʼuliston, Ukraina, Rossiya Federatsiyasi kabi mamlakatlardan taniqli mutaxassislar oʼz maqolalari bilan ishtirok etishmoqda.

Har oyda XXR va Oʼzbekiston tarixi, madaniyati haqida ogʼzaki muloqot va yozma koʼnikmalar darajalarini sinash maqsadida tinglovchilar oʼrtasida tanlovlar oʼtkaziladi. Jumladan, har yili tashkil etilib kelinayotgan “Xitoy tili ko’prigi” musobaqasi Xitoy Xalq Respublikasining O’zbekistondagi elchixonasi tomonidan o’tkazilib kelinadi. 2020-yilgi musobaqa uchun “Osmon ostidagi bir uy” bosh mavzu sifatida tanlab olindi. Dunyo pandemiyasi tufayli musobaqa onlayn ZOOM platformasida o’tkazildi. Musobaqada O’zbekistonning 4 ta oliygoh talabalaridan tanlab olingan umumiy 12 nafar talaba munosib qatnashdi. Samarqand chet tillari institutidan ham 3 nafar talaba, jumladan, Qobilova Shahnoza, Qobilova Maftuna va Vaxabova Niginabonular ishtirok etishdi. 3 soat davom etgan shiddatli musobaqa jarayonida barcha ishtirokchilar o’zlaridagi bilim va tajribalarini ishga solishdi. Musobaqa so’ngida esa eng bilimdon va eng zukko talabalar rag’batlantirildi. Samarqand davlat chet tillar instituti nomini himoya qilayotgan Vaxabova Niginabonu faxrli 2-o’ringa, Qobilova Maftuna va Qobilova Shahnozalar esa 3-o'rinlarga munosib deb topildi. Xitoy Xalq Respublikasi va O’zbekiston Respublikasining uzoq yillardan beri davom etib kelayotgan diplomatik va qo’shnichilik aloqalarini hamda “Bir makon, bir yo’l” loyihasini rivojlantirish yo’lida mana shunday musobaqalar mustahkam ko’prik vazifasini bajarib kelmoqda.

SAMARQAND KONFUTSIY INSTITUTI RAHBARIYATI VA XODIMLARI TARKIBI

 

Konfutsiy instituti yangiliklari:

https://samdchti.uz/yangiliklar/2493

https://samdchti.uz/yangiliklar/2299

https://samdchti.uz/yangiliklar/2297

https://samdchti.uz/yangiliklar/2241

https://samdchti.uz/yangiliklar/2173

https://samdchti.uz/yangiliklar/2164

https://samdchti.uz/yangiliklar/2125

 

Samarqand Konfutsiy instituti markazi

Ishonch telefonlari:	+99866 238 29 39, +99898 279 04 08
Instagram	https://instagram.com/samarkand_confucius?r=nametag
Telegram	https://t.me/samarkand_confucius_institute
Pochta	samarkandci@gmail.com
Manzil:	Samarqand shahri, Bustansaroy 93, Amir Temur haykali yonida (Samarqand davlat chet tillar instituti bosh binosi, 1-qavat).