Bugun respublikada birinchi marta Samarqandda "O‘zbekiston yoshlari forumi-2021" doirasida xorijiy tillarni o‘rganishni targ‘ib etish bo‘yicha “Chet tillari forumi"ga start berildi.

Shu munosabat bilan Samarqand shahridagi yoshlar markazida viloyat mutasaddilari, xorijlik ekspertlar va talaba-yoshlar ishtirokida tadbir tashkil etildi.

Unda xorijiy tillarni o‘rganuvchilar uchun "Cambridge English" imtihonlari, yoshlarning chet tillarida fikrlashi hamda til bilish ko‘nikmalarini shakllantirish borasida gap bordi.

– Yoshlar o‘rtasida chet tillarini targ‘ib qilish orqali ularning kompetensiyaviy ko‘nikmalarini shakllantirish va xorij tajribalari asosida o‘qitish rejalashtirilgan, – deydi Samarqand davlat chet tillar instituti rektori Ilhomjon To‘xtasinov. – Forum doirasida ishtirokchilar besh yo‘nalish bo‘yicha belgilangan joylarda chet tillarini o‘rganish uchun yangi qo‘llanmalar va taqdimotlarda ishtirok etadi. Shuningdek, bilimlarini testlarda sinovdan o‘tkazadi va bilimli yoshlar taqdirlanib, imtiyozlar beriladi.