O'zbek tili, jurnalistika va kompyuter lingvistikasi kafedrasi

O‘zbekiston Respublikasi Vazirlar Mahkamasining «O‘zbek tilining davlat tili sifatidagi qo‘llanilishini kengaytirish, rivojlantirish, ilmiy tadqiqotlarni qo‘llab-quvvatlash, o‘qitish metodikasini takomillashtirish bo‘yicha 2019-2020 yillarga mo‘ljallangan chora-tadbirlar dasturi»da belgilangan vazifalarga asosan 2019 yil oxirida barcha nofilologik Oliy ta’lim muassasalarida o‘zbek tili va adabiyoti fanlarini o‘qitishni yo‘lga qo‘yish hamda kafedralar tashkil etish vazifasi belgilangan edi. Bugungi kunda islohotlar samarasi o‘laroq institutda ushbu kafedraning faoliyati muhim o‘ringa egadir.

Umumiy va amaliy tilshunoslik kafedrasi tashkil etilgan dastlabki yillardayoq iqtidorli yoshlarni ilmiy faoliyatga jalb qilish, fan doktorlari va nomzodlarini tayyorlash, dissertatsiyalarni tashqi taqrizdan o‘tkazish, yangi avlod o‘quv adabiyotlarini yaratish kabi jarayonlarda  peshqadamlar qatorida turdi. Bugungi kunda Respublikamizning turli hududlarida kafedradagi ana shu ilmiy muhitdan bahramand bo‘lib, fan doktori va fan nomzodi ilmiy darajalarini qo‘lga kiritgan tadqiqotchilarni ko‘plab uchratish mumkin. Ularning kattagina qismi  hozirda institutimizning yetakchi professor-o‘qituvchilar qatoridan o‘rin olib ulgurgan.