Ingliz tili kafedrasida ilmiy-uslubiy faoliyat ingliz tilini o‘qitish, chog‘ishtirma tilshunoslik, lingvopragmatika, kognitiv tilshunoslik, diskurs tahlili, leksik kompetensiya, mamlakatshunoslik va lingvomadaniyatshunoslik yo‘nalishlarida olib boriladi. Kafedra professor-o‘qituvchilari o‘quv jarayoniga zamonaviy pedagogik texnologiyalarni joriy etish, amaliy mashg‘ulotlarni takomillashtirish, talabalar kommunikativ kompetensiyasini rivojlantirish va ilmiy-tadqiqot ishlarini kuchaytirishga alohida e’tibor qaratadilar.

PhD dissertatsiya himoyalari va ilmiy yutuqlar

Ingliz tili kafedrasida ilmiy-tadqiqot ishlari izchil rivojlanib bormoqda. Kafedraning ilmiy salohiyati 46 foizni tashkil etadi. Kafedrada filologiya fanlari bo‘yicha falsafa doktori (PhD) hamda pedagogika fanlari bo‘yicha falsafa doktori (PhD) ilmiy darajasiga ega professor-o‘qituvchilar faoliyat yuritmoqda.

Ingliz tili kafedrasi vakili Rasulova Sohiba Ulug‘bekovna 10.00.04 — “Yevropa, Amerika va Avstraliya xalqlari tili va adabiyoti” ixtisosligi bo‘yicha filologiya fanlari bo‘yicha falsafa doktori (PhD) ilmiy darajasini beruvchi diplomni olganligi munosabati bilan taqdirlandi. Unga diplom hamda noutbuk topshirildi. Ushbu yutuq kafedraning filologiya va tilshunoslik yo‘nalishidagi ilmiy natijalarini yanada mustahkamladi.

Ingliz tili kafedrasi vakili Tagaeva Tamara Baxadirovna ham 10.00.04 — “Yevropa, Amerika va Avstraliya xalqlari tili va adabiyoti” ixtisosligi bo‘yicha filologiya fanlari bo‘yicha falsafa doktori (PhD) ilmiy darajasini beruvchi diplomni olganligi munosabati bilan taqdirlandi. Unga noutbuk topshirildi. Mazkur ilmiy yutuq kafedra professor-o‘qituvchilarining ilmiy izlanishlari va kasbiy rivojlanishining muhim natijasi hisoblanadi.

2026-yilda Ingliz tili kafedrasi o‘qituvchisi Buranova L.U. ilmiy dissertatsiyasini muvaffaqiyatli himoya qildi va pedagogika fanlari bo‘yicha falsafa doktori (PhD) ilmiy darajasiga ega bo‘ldi. Ushbu ilmiy yutuq kafedraning ilmiy salohiyatini oshirish, ingliz tilini o‘qitish metodikasi va zamonaviy pedagogik yondashuvlarni rivojlantirishga muhim hissa qo‘shdi.

2026-yilda kafedra o‘qituvchisi Dushanova N.M. ham ilmiy dissertatsiyasini muvaffaqiyatli himoya qilib, pedagogika fanlari bo‘yicha falsafa doktori (PhD) ilmiy darajasini qo‘lga kiritdi. Uning ilmiy muvaffaqiyati kafedrada tadqiqot faoliyatining faollashuvi, o‘quv-uslubiy ishlarning takomillashuvi hamda yosh tadqiqotchilar uchun ilmiy muhitning mustahkamlanishiga xizmat qildi.

Ilmiy Nashrlar

 

Ingliz tili kafedrasi professor-o‘qituvchilari tomonidan so‘nggi yillarda ingliz tilini o‘qitish metodikasi, nutq ko‘nikmalarini rivojlantirish, akademik tadqiqot asoslari, mamlakatshunoslik, leksik kompetensiya va diskurs tahlili yo‘nalishlarida bir qator darslik, o‘quv qo‘llanma, amaliy modul va monografiyalar tayyorlandi.

Kafedraning muhim nashrlaridan biri O.Ya. Yusupov, G.X. Obruyeva va S.U. Rasulova hammuallifligidagi “Practical Aspects of Language: Lexical Competence and Discourse Analysis” nomli darslikdir. Ushbu darslik 2025-yilda nashr etilgan bo‘lib, 60110900 — Xorijiy til va adabiyoti (ingliz tili) ta’lim yo‘nalishi talabalari uchun mo‘ljallangan. Darslik leksik kompetensiya, diskurs tahlili, kommunikativ leksika, nutq xususiyatlari, yozma va og‘zaki diskurs kabi mavzularni qamrab oladi.

2025-yilda T.B. Tagayeva, N.A. Ibadova, Z.B. Soliyeva, Z.Z. Saliyeva, P.Sh. Begbudiyeva, L.U. Buranova va M.U. Buranova tomonidan “Nutq ko‘nikmalari integratsiyasi” nomli o‘quv qo‘llanma tayyorlandi. Qo‘llanma 210 betdan iborat bo‘lib, 2-kurs talabalari uchun amaliy ingliz tili mashg‘ulotlarida foydalanishga mo‘ljallangan. Unda tinglab tushunish, gapirish, muloqotda ishonchni oshirish, ravon nutq va amaliy kommunikativ kompetensiyani rivojlantirishga qaratilgan mashqlar berilgan. Nashrga Samarqand davlat chet tillar institutining 2025-yil 21-maydagi 161-sonli buyrug‘i asosida ruxsat berilgan, ro‘yxatga olish raqami №160/08.

Kafedra professor-o‘qituvchilari tomonidan “Country Study” nomli darslik ham tayyorlanib, 60230100 — Filologiya va tillarni o‘qitish (ingliz tili) ta’lim yo‘nalishi talabalari uchun tavsiya etilgan. Ushbu darslik ingliz tilida so‘zlashuvchi mamlakatlarning tarixi, madaniyati, ta’lim tizimi, ijtimoiy hayoti va milliy xususiyatlarini o‘rganishga xizmat qiladi. Darslik Samarqand davlat chet tillar institutining 2025-yil 27-noyabrdagi 351-sonli buyrug‘i asosida nashrga tavsiya etilgan.

Sh.A. Rustamova tomonidan tayyorlangan “Integrating Speech Competences: A Practical Module” nomli amaliy modul 60111800 — Foreign Language and Literature ta’lim yo‘nalishi uchun ishlab chiqilgan. Modul B2/B2+ darajadagi 2-kurs talabalari uchun mo‘ljallangan bo‘lib, 60 ta mavzuni qamrab oladi. Unda lug‘at bilan ishlash, mavzu yuzasidan muloqot qilish, tinglab tushunish, tanqidiy fikrlash, ijodkorlik va kommunikativ kompetensiyani rivojlantirishga qaratilgan topshiriqlar berilgan.

Kafedra a’zolari tomonidan “Basis of Academic Research” nomli darslik mualliflik huquqi obyekti sifatida deponentlashtirilgan. Ushbu hujjat O‘zbekiston Respublikasi Adliya vazirligi huzuridagi Intellektual mulk markazi tomonidan 2025-yil 13-yanvarda №008578 raqam bilan reyestrga kiritilgan. Mualliflar: Saliyeva Ziroat Zokirovna, Ibadova Nafisa Axmatilloyevna, Tagayeva Tamara Baxodirovna, Soliyeva Zarina Botirovna, Buranova Lola Uktamovna, Begbudiyeva Parvina Shoxruxovna va Buranova Madina Uktamovna.

Shuningdek, M.U. Buranova tomonidan “Инновационные стратегии обучения чтению на английском языке в вузах” nomli monografiya tayyorlangan. Monografiya oliy ta’lim muassasalarida ingliz tilida o‘qish ko‘nikmalarini rivojlantirishda innovatsion yondashuvlar, metodik strategiyalar va zamonaviy ta’lim texnologiyalarini qo‘llash masalalariga bag‘ishlangan.

Kafedra ilmiy izlanishlar, xalqaro seminarlar, ilmiy-amaliy konferensiyalar, dissertatsiya tadqiqotlari hamda talabalarning mustaqil ilmiy faoliyatini qo‘llab-quvvatlash orqali institutning ilmiy salohiyatini oshirishga hissa qo‘shib kelmoqda.